قواعد الحياة ... الجزء الأول

فى البداية أحب أن أشكر الكابتن/ فتحى محمد على ( عماشة ) Fathy Mohamed على مساعدته وإخلاصة فى ترجمة هذا الكتاب وطبع نسخة خاصة لى .

وأحب أضيف أنى أستفدت كتير أوى أوى من الكتاب اللى هتكلم عليه فى السطور القادمة وكمان أحب أقول لكل صديق لى أنه يقرأ الكلام اللى هكتبه بدقة وبإستيعاب .

كتاب قواعد الحياة كتاب مش عادى ( هو الأكثر مبيعا حول العالم ) وعلشان كدة أنا أخترت أحلى قواعد موجودة فى الكتاب دة وصغتها بأسلوبى وبأمثلة من عندى تكون قريبة لكل اللى هيقرأ هذا الكلام هى مش أحلى قواعد بالنسبة لحد هيا أحلى قواعد بالنسبالى دى اللى انا قريتها والحقيقة أتمزجت منها أوى .. وشوفت فيها قمة الفلسفة خلاصة الخلاصة قمة العبقرية وأحب أبتدى القواعد بقعديتين ذهبيتين مهمين فى الكتاب دة اوى وهما :-

1- القاعدة الأولى ( خليك سرى ) :-

-----------------------------

... بمعنى ،، كل أصحابى اللى حواليا أنا بقولهم المثل دة على طول لنفترض أنك بتعمل رجيم وقلت لكل اللى حواليك أنك بتعمل رجيم ( أكبر طبق هيتملى هوة طبقك ) كل الستات أو كل الرجالة هيتلموا عليك " ياراجل رجيم أة كل كل ما انت شايف الكرش دة عز أحنا مربينه ... لازم يكسروك ويحبطوك فى خططك ) فمتقولش لحد أنت بعمل أة ،، أوعى تكون بتعمل شئ كويس وتقول لحد عليه وهستشهد بحديث جميل أوى (استعينوا على قضاء حوائجكم بالكتمان) ودى القاعدة الأولى اللى عجبتنى أوى .

2- القاعدة الثانية ( نفذ ) :- 

----------------------

... طبعا عمر ما فى حد هينفذ قواعد الكتاب كلها سواء أنا أو أى شخص أخر ولكن فى قواعد موجودة فى الكتاب دة أما تمشى بيها فى الحياة هتحس بفرق كبير وعلى فكرة أنا فى قواعد أستخدمتها الفترة اللى فاتت فرقت معايا فى حاجات كتير أوى أوى أوى ... عملتلى سعادة وبعدين السعادة دى كان مصدرها أن أنا لما طبقت الحاجة دى وشوفت نتيجتها ( قولت أة دة !!!! ) الكتاب دة فعلاً جامد اوى علشان كدة لو قررت تاخد قاعدة من الكتاب وتمشى بيها فى الحياه نفذها بشكل كامل .

3- القاعدة الثالثة ( روح الدعابة والمرح ) :- 

-----------------------------------

... خلى عندك روح الدعابة وروح المرح لأن الحياة صعبة جداً يعنى حاول دايماً فى كل موقف صعب تطلع فيه شئ أنت تضحك منه أو تلاقى فيه الدعابة .. يعنى متبقاش باصص للأشياء بنظرة كشرة .. حتى فى أسوء المواقف ... يعنى مثلاً أنا زملكاوى ( لى الفخر بذلك ) فلما الزمالك ( سابقاً ) كان بيتغلب كنت بحاول دايما أطلع دعابة فى المباراة ( أن ربنا مثلاً مش كاتب ناخد دورى أن مهما حصلت الثورة عمرنا ماهناخد أى حاجة ) وطبعاً الكلام دة عكس هذا الموسم 2014/2015 ( أبطال الدورى ) المهم تطلع دايما روح الدعابة فى أى شئ وأى موقف صعب ودة أنا بعمله على طول .

4- القاعدة الرابعة ( مفيش حاجة صدفة ) :-

-------------------------------------

.... أوعى قلبك يقولك أو عقلك يوهمك أن فى حاجة صدفة وعلى فكرة الكتاب مش بيتكلم بشكل دينى فى النقطة دى ( أنت تصنع واقعك ) هقولكم على حاجة .. أنت نازل من البيت فتحت الباب وقفلت ونزلت فى الأسانسير بعد لما ركبت الأسانسير وأنت نازل أكتشفت أنك نسيت مفاتيح الشقة روحت طالع تانى وأحضرت المفاتيح وأنت نازل تانى قابلت واحد صاحبك كان فى السعودية قالك دة أحنا محتاجين واحد بتاع كمبيوتر فى السعودية والمرتب مليون ونص فى السنة ( أنت طلعت ونسيت المفاتيح علشان صاحبك دة يقابلك .. مفيش حاجة صدفة ) وعلى فكرة أنت لو كنت نازل ومعاك المفاتيح أصلاً مكنتش هتقابل صاحبك بتاع السعودية .. لذلك أوعى حد يفتكر أن فى حاجة صدفة ... المشكلة أنى بقابل ناس كتير معتقدين أن حركتهم فى الحياة سدى لا تساوى أى شئ وببساطة شديدة انت لما نزلت وقابلت الراجل بتاع السعودية الراجل دة لقاك فخدك فى الشركة فأنت أشتغلت فى الشركة فالشركة نجحت وأصبحت بالتالى ترس ( جوة منظومة الحياة ) أوعى حد يفتكر أنه ملوش لازمة ... مفيش حاجة صدفة ... وخلينا نشوف أزاى ممكن الساعة هتشتغل لو فى ترس صغير فى الساعة مشتغلش .

5- القاعدة الخامسة ( أنت متعرفش الخير فين ) :-

------------------------------------------

فى أشياء تبدو تافه عند ناس كتير ( مثال ) ... جه واحد صاحبك قالك أنا بعمل سايبر نت ( إنترنت كافية ) وقالك أدينى 1000 جنية فانت قولت أة المبلغ التافة دة وأديته الــ 1000 جنيه بدون مبالاه فالراجل خد الــ 1000 جنيه والفلوس دى أشتغل بيها وجاب ناس وكبر السايبر وحط بلياردو وكمان بلاستيشن ونجح المشروع بشكل كبير لذلك ( أنت متعرفش الخير فين ) وعشان كدة الواحد دايما لازم يسعى .. من كام يوم شوفت أحد الشيوخ بيتكلم فى التليفزيون أن الدين الإسلامى لا يحب الإكتناز فكرة أن الواحد يعمل شوية فلوس ويحطهم فى البنك وياخد فوايدهم دة شئ خاطئ .. الدين الإسلامى عايزك دايماً تخرج فلوسك علشان كدة ربنا فرض الزكاة علشان تحرك فلوسك .. علشان كدة أنت متعرفش الخير فين ومش معنى كدة أنك لازم تكون عظيم أو أنك تشارك الوليد أبن طلال أو بيل جيتس .. لكن أنت ممكن تعمل شئ صغير وأنت متعرفش ممكن يبقى عظيم قد أة وأنا من خلال تجربتى أتعلمت أن الحاجات الصغيرة جانب بعضها بتعمل حاجة كبيرة .

6- القاعدة السادسة ( دائرة الراحة ) :-

--------------------------------

بمعنى .. أنت دايماً قاعد فى البيت بتاعك أخر الشهر المرتب بيدخل حسابك والعيال حواليك ومراتك جانبك فكل يوم أنت نازل فى دايرة الراحة دى بس أتعود أن الحياة مش كدة خالص وأتعود دايماً أن ممكن يحصل شئ إستثنائى الضرايب يخشوا عليك مباحث الكهربا يجولك عربيتك تتخبط ... أتعود دايماً تكون خارج الديرة بتاعت الراحة دى وأنا بسميها دايرة ( البليلة ) وطبعاً الحياة البطة دى مش وحشة كلها بس أنا بقول أتعود دايماً أن فى كل الأحيان أنا جاهز ... العربية أتخبطت ( تصلحها أزاى وتشوف الميكانيكى ) والدتك مرضت ( أنقلها أزاى المستشفى وأزاى أكون مستعد لأى سيناريو ) كان فى زمان وأنا صغير عبارة فى الكشافة مشهورة وهى ( كن مستعد ) وعلشان كدة دايماً كن مستعد لأى شئ خارج المؤلوف وخارج دايرة الراحة ... وعلى فكرة الناس اللى جوة دايرة الراحة على طول عمرها ما هتنجح ,, وطبعاً ممكن الناس اللى تقرا كلامى يقولولى أحنا برة دايرة الراحة على طول ( أحب أقولهم أن دى حاجة بتصنع الرجالة ) .

7- القاعدة السابعة ( أتعلم تسأل ) :-

------------------------------

ودة أنا أتعلمت أعمله على طول يعنى مثلا لما أخش أى مطعم وشوف أكلة جديدة مثلاً أحب أنى أسأل ( الويتر ) الأكلة دى بتتعمل أزاى وتوابلها بتتحط أزاى وبتتحشى من جوة بأه وطعمها أة وهكذا .. أتعود دايماً تسأل أسئلة وفى عبارة جميلة فى الموضوع دة ( أسأل تسلم ) وأنا لاحظت الناس بتخجل من السؤال متتكسفش أنك تسأل ، تبقى واخد مراتك وعيالك فى حتة وأنت مش عارف أنت ماشى أزاى ولا تعرف أنت رايح فين وتقولهم أنا عارف الطريق ... العالم كله برة بيسأل والقرأن بيقول ( وأسألوا أهل الذكر أن كنتم لا تعلمون ) قابلت واحد كورى أويابانى مش عارف بالظبط وكان معاه مترجم وبعدين قالى أكتب أسمى بالعربى فكتبت أسمه بالعربى ولما سألته ليه عايز تكتب أسمك بالعربى قالى عن طريق المترجم علشان أتعلم حاجة جديدة ... لذا دايماً أسأل .

9- القاعدة التاسعة ( خلى عند كرامة ) :-

----------------------------------

فكرة الكرامة دى مهمة أوى يعنى حاول طول يومك دايماً تعمل الحاجة بكرامة فى شغلك فى بيتك فى الشارع بحيث لما تروح البيت تحس أنك فخور بنفسك وأنك عملت الأشياء بكرامة ... جه حد مثلاً كان عايز يعمل حاجة غلط وأنت قولت لأ أنا مش هعمل الحاجة دى ( عارف أنت الواحد لما يحس أنه عايش الحياة بكرامة ) فى ناس مشكلتها فى الحياة أنها عندها أحساس بالتافه انما لما تعمل أشياء زى دى فى يومك تفخر بذاتك ( والكتاب بيقول فى الموضوع دة .. أن الكرامة كلها أن يكون عند إحترام لنفسك وتقدير عالى لذاتك ) أنا أنسان محترم .

نستكمل الجزء الثانى قريباً من كتاب قواعد الحياة ..

وبشكر الكابتن/ فتحى عماشة مرة أخرى